އިސްލާމީ އުންމަތުގެ އެންމެ ބޮޑު ރައުސްމާލަކީ އިލްމުވެރިންނެވެ. އެބޭފުޅުންނަކީ ނަބީބޭކަލުންގެ ވާރުތަވެރިންނެވެ. ނަމަވެސް، މިއަދުގެ ހާލަތަށް ބަލާއިރު، އިލްމުވެރިންގެ ދައުރާއި އެބޭފުޅުންގެ މިސްރާބާ މެދު އާންމުންގެ ތެރޭގައި ވަނީ ބޮޑެތި ސުވާލުތަކެއް އުފެދިފައެވެ. ޚާއްޞަކޮށް، ސެކިއުލާ ނިޒާމުތަކާއި، އިސްލާމީ އުންމަތަށް ދެވޭ އަނިޔާތަކާ ދެކޮޅަށް ބަސްނުބުނުމަކީ ގިނަ ބަޔަކު މިއަދު އިލްމުވެރިންނަށް ކުރާ އެންމެ ބޮޑު ޝަކުވާއެވެ.

ގިނަ ފަހަރަށް ފެންނަނީ މަޝްހޫރު ޔުނިވަރސިޓީތަކުން ދަސްވެނިވެފައިވާ އިލްމުވެރިން، ސަރުކާރުތަކުގެ ނުފޫޒުގެ ދަށުވެ، ދީނުގެ އަސާސްތަކަށްވުރެ ބޮޑަށް ސިޔާސީ މަސްލަހަތަށް އިސްކަންދޭ މަންޒަރެވެ. ޝަރީޢަތަށް ވަކާލާތުކުރާ މީހުންނާއި، އިސްލާމީ އުންމަތުގެ ހައްގުގައި މަސައްކަތްކުރާ މީހުންނާ ދެކޮޅަށް ބޭނުންކުރާ "އައިޑެންޓިފިކޭޝަން" ޕްރޮގްރާމްތަކަށް ބައެއް އިލްމުވެރިންގެ އެހީތެރިކަން ލިބުމަކީ، މުސްލިމުންގެ މެދުގައި އިލްމުވެރިންނަށް އޮތް އިތުބާރު ކުޑަވާ ސަބަބެކެވެ.

މިއަދުގެ މުޖުތަމައުގައި ފެންނަ އެންމެ ހިތާމަވެރި އެއް ކަމަކީ، ވެރިންގެ ނުބައި އަމަލުތަކަށް ފާޑުކިޔާ ނުވަތަ އިލްމުވެރިންގެ މުނާފިގުކަން ފާހަގަކުރާ ކޮންމެ މީހަކީ "ޚަވާރިޖެއް" ކަމުގައި ލޭބަލްކުރުމެވެ. އިސްލާމީ ތާރީޚުގައި ޚަވާރިޖުންނަކީ ވަކި ސިފަތަކެއް ހުރި ބައެއް ނަމަވެސް، މިއަދު މި ބަސް ބޭނުންކުރެވެނީ ސިޔާސީ އިދިކޮޅު ޚިޔާލުތައް ހުއްޓުވުމަށް ބޭނުންކުރާ ހަތިޔާރެއްގެ ގޮތުގައެވެ.

މުސްލިމް މުއައްސަސާތަކުން މިފަދަ އިލްމުވެރިންނަށް މަތީ މަގާމުތަކާއި އިއްޒަތް ދެމުންދާއިރު، ހަގީގީ މައްސަލަތަކާ މެދު ބަސްބުނާ އިލްމުވެރިން ތިއްބެވީ އެކަހެރިކުރެވިފައެވެ. މިކަމުގެ ނަތީޖާއަކީ ޒުވާން ޖީލުގެ ހިތްތަކުގައި ދީނީ އިލްމުވެރިންނާ މެދު ފޫހިކަން އުފެދުމެވެ. ދީނަކީ ހަމައެކަނި މިސްކިތުގެ މިންބަރުމަތީގައި ދައްކާ ހިކި ވާހަކަތަކެއްގެ ގޮތުގައި ފެނި، އަމަލީ ދިރިއުޅުމުގެ މައްސަލަތަކަށް ހައްލެއް ނުލިބުމެވެ.

އިލްމުވެރިންގެ އަސްލު މަގާމަކީ ހައްގު ބަސް ބުނުމެވެ. އެއީ ކޮންމެފަދަ ބާރުވެރި ފަރާތެއްގެ ކުރިމަތީގައި ނަމަވެސްމެއެވެ. އިލްމުވެރިން ސިޔާސީ އޮއިވަރުގައި ޖެހި، އުންމަތުގެ މަސްލަހަތަށްވުރެ އަމިއްލަ މަސްލަހަތު އިސްކުރުމަކީ އިސްލާމްދީނަށް ދެވޭ ބޮޑު ބޭވަފާތެރިކަމެކެވެ. އަޅުގަނޑުމެން ބޭނުންވަނީ ނަބަވީ މަންހަޖުގެ މަތީގައި ސާބިތުވެ ތިއްބަވާ، ހިތްވަރުގަދަ އަދި އަމާނާތްތެރި އިލްމުވެރިންނެވެ.

ރެފެރެންސް:ހތތޕސ://×.ޗޮމ/ީބނަލީސކަނދަރ/ސތަތުސ/2027263803537445274؟ތ=ޡޚ7އުޢށޮޥުގޢޟރޯ_-ބނޗޛޤ&ސ=19